"Chagueni Viongozi bora watakaotuvusha miaka mitano ijayo" - RAS Nguvila

Posted on: November 23rd, 2024

Katibu Tawala wa Mkoa wa Dar es salaam Ndugu Toba Nguvila amewataka wananchi kujitokeza kwa wingi siku ya kupiga kura Novemba 27,2024 na kuchagua viongozi watakaoweza kuwavusha kimaendeleo kwa miaka mitano ijayo.

Ameyasema hayo wakati wa Bonanza la michezo lililofanyika katika viwanja vya Mwembeyanga lililouwa na lengo la kuhamasisha wananchi kujitokeza kupiga kura.

Katibu Tawala huyo amesema Uchaguzi huu wa Serikali za Mitaa utatoa taswira ya muelekeo wa maendeleo katika miaka mitano ijayo,hivyo ni muhimu wananchi kujitokeza na kushiriki zoezi hilo muhimu.

"Niwasihi sana ndugu zangu,Uchaguzi huu ni muhimu kwa mustakabali wa maendeleo katika maeneo yetu tunavyoishi...nendeni mkachague viongozi bora watakaowavusha kwa kipindi cha miaka mitano ijayo". Alisema Nguvila.

Katika Bonanza hilo, timu mbalimbali kutoka manispaa za mkoa wa Dar es salaam zilishiriki michezo mbalimbali ikiwemo mpira wa miguu,mpira wa wavu,burudani kutoka wasanii wa singeli nk.

Uchaguzi wa Serikali za Mitaa unatarajiwa kufanyika Novemba 27 mwaka huu ambapo Serikali imetangaza siku hiyo kuwa siku ya mapumziko.