Kiongozi wa Mbio za Mwenge wa Uhuru 2021 Aweka Jiwe la Msingi Ujenzi wa Hospitali Binafsi ya Al-Amal iliyopo Liwiti

Tarehe iliyowekwa: August 18th, 2021

Na Neema Lukali

Kiongozi wa Mbio Maalum za Mwenge wa Uhuru Mwaka 2021, Luteni Josephine Paul Mwambashi ameweka jiwe ka msingi katika mradi wa ujenzi wa Hospitali binafsi ya Al-Amal iliyopo Kata ya Liwiti Mtaa wa Mfaume wakati wakikimbiza Mwenge wa Uhuru, Wilaya ya Ilala, tarehe 18 Agosti 2021.

Akisoma taarifa kwa Kiongozi wa Mbio za Mwenge wa Uhuru, Dkt. Adam Othman ambaye ni Mkurugenzi Mkuu wa ‘DIRECT AID SOCIETY’ alieleza kuwa mradi huo upo chini ya Asasi ya ‘Direct aid society’ inayojulikana kama ‘AFRICAN MUSLIM AGENCY’  ambayo ilianzishwa mwaka 1981 na Hayati Dkt. Abdul-rahman Asumer, lengo likiwa kutoa huduma katika nyanja mbalimbali kama vile; Elimu, Ustawi wa Jamii, Kuyajengea uwezo makundi maalum pamoja na utoaji wa maji safi, na vilevile Taasisi hiyo imelenga kuchangia maendeleo ya Afrika katika kutoa misaada ya kibinadam kwa Wanawake, Vijana na Makundi maalum.

Aidha, Dkt Adam alielezea jinsi mradi huo umeguswa na kipengele cha nne nukta mbili (4.2) kinachohusika na uwekezaji Wilayani katika suala zima la afya “Mradi huu wa ujenzi wa hospitali ulianzishwa Juni, 2020 na unatarajiwa kumalizika Disemba 2021 mpaka hapa uliopofikia, mradi umegharimu takribani Shilingi Bilioni Kumi na Moja (11) utakapokamilika gharama itafikia Shilingi Bilioni Ishirini na Nane (28) kwa mahesabu ya ujenzi, vifaa tiba na thamani”

Kukamilika kwa ujenzi wa hospitali hii utaleta manufaa zaidi kwa wakazi wa Wilaya ya Ilala na hata walioko maeneo ya jirani. Hospitali  hii itatoa huduma ya wagonjwa wa nje (OPD) na huduma za ndani, Huduma za Baba, Mama na Mtoto (RCH) vilevile kutakuwa na huduma za Maabara na Dawa, Huduma za kujifungua kwa wamama wajawazito pamoja na waangalizi wa watoto wachanga, Huduma za miyonzi kama vile Ultrasound, X-ray, MRI na CT scan. Pia kutakuwa na uwepo wa madaktari bingwa wa upasuaji mdogo na mkubwa pamoja na Madaktari bingwa wa meno.

Naye Bwana Ignas Maembe, Afisa Mtendaji wa Kata ya Liwiti ameupongeza na kushukuru kuwepo kwa mradi huu wa ujenzi wa hospitali  ya Al-Amal uliofadhiliwa na  AFRICAN  MUSLIM AGENCY "mradii huu unamanufaa makubwa sana ya baadaye tunaishukuru Serikali ya Awamu ya Sita ikishirikiana na ufadhili wa ASAS ya AFRICAN MUSLIM AGENCY  kwani utarahisisha watu kupata huduma ya afya asilimia mia moja bila kwenda mbali na pia mradi huu utaleta maendeleo ya kibiashara katika jimbo la Segerea".