Kituo Kikuu cha Mabasi Ubungo kuzalisha ajira 20,000

Tarehe iliyowekwa: September 29th, 2017

MSTAHIKI Meya wa Jiji la Dar es Salaam Isaya Mwita amekutana na ugeni kutoka Jiji la Shanghai nchini China na kujadili mambo mbalimbali ya maendeleo jijini hapa ikiwemo suala la uboreshaji wa Kituo Kikuu cha Mabasi yaendayo Mikoani na nchi jirani cha Ubungo.

Ugeni huo ulioambatana na Meneja Mkuu wa Kampuni ya Linghang, Cathy Wang ambayo ndiyo imeingia mkataba na Halmashauri ya Jiji la Dar es Salaam kwa ajili ya ujenzi wa kituo hicho.

Akizungumza na waandishi wa habari jijini hapa mara baada ya kumalizika kwa mazungumzo hayo, Meya Mwita alisema kuwa ugeni huo umeridhia kuwekeza katika nyanja mbalimbali ikiwemo Kituo cha Mabasi Ubungo.

Alifafanua kuwa Jiji la Dar es Salaam linakaribia kuanza kufanya ujenzi wa mradi mkubwa wa kubadilisha Kituo cha Mabasi Ubungo na kwamba hatua mbalimbali zimeshakamilika ili kupisha mradi huo.

Alisema kuwa mara baada ya kukamilika kwa mradi huo jumla ya Watanzania 20,000 watapata ajira jambo ambalo litawezesha kuongeza kipato kwa wananchi na hivyo pia kuwawezesha vijana kuondokana na makundi ambayo sio salama.

Alisema kufanikisha kwa mradi huo, kutasaidia pia kuongeza mzunguko wa fedha jijini hapa kutokana na kuwepo kwa fursa nyingi za kibiashara.

“Leo nimekutana na ugeni ambapo kwa kiasi kikubwa mnafahamu ndugu zetu hawa wamekuwa na urafiki mkubwa na nchi yetu, tumejadiliana mambo mengi ambayo yote ni kwa lengo la kuleta maendeleo katika Jiji letu.

“Lakini kubwa zaidi ni kuhusu ujenzi wa Kituo cha Mabasi Ubungo, ambapo hivi karibuni tunatarajia kuanza kwa mradi huo, na wananchi pia watajulishwa, nitumie fursa hii kuwaeleza wananchi kuwa Jiji linafuata utaratibu katika kutekeleza mradi huo” alisema Meya Mwita.

“Fursa hii kubwa ambayo tumeipata, Watanzania watapata ajira, mzunguko wa fedha kwenye Jiji letu utaongezeka, kama Meya wa Jiji hili nimewakaribisha tufanye kazi pamoja, lengo likiwa nikuweka Jiji kwenye muonekano mzuri” aliongeza.

Kwa upande wake Meneja Mkuu wa Kampuni ya Linghang, Cathy Wang alimpongeza Meya Mwita kutokana na aina ya utendaji wake wa kazi na kuahidi kuonyesha ushirikiano katika utekelezaji wa mradi huo.

Alisema kuwa Meya Mwita ni kiongozi anayefanya kazi kwa bidii na umakini na kwamba kutokana na jitihada hizo za kulijenga Jiji, kampuni yao itafanya  kazi kwa ushirikiano mkubwa.