Madiwani Jiji la Dar es Salaam wamchagua Naibu Meya wa Jiji

Tarehe iliyowekwa: August 30th, 2019

Baraza la Madiwani la Halmashauri ya Jiji la Dar es Salaam leo tarehe 30 Agosti, 2019 limefanya Mkutano Mkuu wa Mwaka katika ukumbi wa Karimjee na kumchagua Diwani wa Kata ya Kibonde Maji kwa tiketi ya Chama cha Mapinduzi (CCM), Mheshimiwa Abdallah Mtinika kwa kura 16 dhidi ya mpinzani wake Mheshimiwa Ally Haroub, Diwani wa Kata ya Makumbusho kwa tiketi ya Chama Cha Wananchi (CUF) aliyepata kura 10.

Akiongea baada ya ushindi huo, Mheshimiwa Mtinika alitoa shukrani za dhati kwa Chama chake na Waheshimiwa Madiwani wote waliomuamini na kumpigia kura na kuahidi kushirikiana nao katika kuwatumikia wananchi wa Dar es Salaam kwa lengo la kuwaletea maendeleo.

Awali akiongea kabla ya uchaguzi huo Mstahiki Meya wa Jiji la Dar es Salaam, Isaya Mwita aliwaasa Waheshimiwa Madiwani na Watendaji wa Halmashauri ya Jiji la Dar es Salaam kuvumiliana na kufanya kazi kwa pamoja ili kuweza kuwaletea maendeleo wananchi wa Dar es Salaam na Taifa kwa ujumla.

Wenyeviti wa Kamati za Kudumu waliochaguliwa kupitia Mkutano Mkuu wa Mwaka ni pamoja na Mheshimiwa Songoro Mnyonge ambaye ataaongoza Kamati ya Mipango na Uratibu na Mstahiki Meya, Isaya Mwita ataongoza Kamati ya Fedha na Uongozi.

Kamati ya Mipangomiji, Miundombinu na Mazingira itaongozwa na Mheshimiwa Patrick Asenga kama Mwenyekiti wa Kamati hiyo.

Wenyeviti waliochaguliwa kuongoza Kamati ya Huduma za Jamii ni Mheshimiwa Leyla Madibi na Kamati ya Maadili itaongozwa na Mheshimiwa Mariam Lulida.

Wananchi na wadau mbalimbali wa Halmashauri ya Jiji la Dar es Salaam walihudhuria Mkutano Mkuu wa Mwaka wa Halmashauri ya Jiji walipata fursa ya kupokea taarifa za utekelezaji kwa mwaka wa fedha 2018/2019 pamoja na mawasilisho ya ratiba za vikao vya Kamati za Kudumu za Halmashauri ya Jiji la Dar es Salaam kwa mwaka wa fedha 2019/2020.