Madiwani Jiji watoa msaada Taasisi ya Saratani Ocean Road

Tarehe iliyowekwa: May 27th, 2019

Wajumbe wa Baraza la Madiwani la Halmashauri ya Jiji la Dar es Salaam wakiongozwa na Mstahiki Meya wa Jiji Mhe. Isaya Mwita Charles leo tarehe 27 Mei, 2019 wamefanya ziara na kutoa msaada wa mashuka 532 na katoni 22 za sabauni kwa ajili ya wagonjwa wanaotibiwa katika Taasisi ya Saratani ya Ocean Road.

Akizungumza katika ziara hiyo Mstahiki Meya alitoa pongezi za dhati kwa Menejimenti ya Taasisi ya Saratani ya Ocean Road kwa kazi nzuri wanayoifanya na kueleza kwamba msaada huo mdogo ambao Jiji la Dar es Salaam umeutoa ni mwanzo tu wa ushirikiano endelevu kati ya taasisi hizo mbili jirani ili kuweza kufikia lengo la kuwahudumia wananchi wa Dar es Salaam na Watanzania wote kwa ujumla na kutoa ahadi ya kushirikiana katika kuzianisha changamoto mbalimbali za Taasisi hiyo ili kuweza kuzipatia ufumbuzi kwa pamoja.

Akipokea msaada huo, Kaimu Mkurugenzi Mtendaji wa Taasisi ya Saratani ya Ocean Road, Bi. Beatrice Erasto ametoa shukrani kwa Halmashauri ya Jiji la Dar es Salaam kwa kuwaunga mkono katika mapambano dhidi ya Saratani na kwa msaada uliotolewa na kueleza kuwa umeletwa wakati muafaka ukizingatia kwamba matibabu ya Saratani yanachukua muda mrefu kwa wagonjwa kulazwa katika Taasisi hiyo.

Alisema Serikali imejitahidi kutoa vifaa tiba na huduma mbalimbali kwa Taasisi hiyo pekee ya Saratani ya Serikali na kueleza changamoto ya uhaba wa jengo la wodi ya wagonjwa pamoja na makabati maalum ya kuhifadhia vifaa vya wagonjwa na kuwaomba wadau wengine wawaunge mkono kama ilivyofanya Halmashauri ya Jiji la Dar es Salaam katika kukabiliana nazo.