Madiwani Manispaa ya Singida wafurahishwa na miradi inayotekelezwa kwa ubia katika Jiji la DSM

Tarehe iliyowekwa: January 30th, 2025

Na: Shalua Mpanda

Mstahiki Meya wa Manispaa ya Singida mheshimiwa Yagi Kiaratu amesema wao kama Manispaa wamejifunza na kufurahishwa na mradi wa ujenzi wa jengo la kibiashara la DDC unaotekelezwa kwa ubia kati ya Sekta ya Umma na sekta binafsi (PPP).

Akiambatana na waheshimiwa madiwani na wataalamu kutoka Manispaa hiyo, Mstahiki Meya huyo ameusifu uongozi wa Halmashauri ya Jiji la Dar es Salaam kwa kuwa na wazo hilo linalowezesha utekelezaji wa mradi mkubwa kama huo bila kutumia fedha zake za ndani.

"Tumeona kuna umuhimu wa kutoka na kuja kujifunza sehemu nyingine,na moja ya eneo tulilolenga ni Jiji la Dar es salaam ambalo kiukweli wanafanya vizuri hasa kwenye ukusanyaji wa mapato na udhibiti wa takataka". Alisema Mhe. Kiaratu.

Amesema ujenzi wa mradi huo unaogharimu zaidi ya Shilingi bilioni 37 wenye mkataba wa miaka 25 na muwekezaji huyo utakapomalizika utaweza kuiongezea Halmashauri hiyo mapato.

Kwa upande wake Kaimu Mkurugenzi wa Jiji la Dar es Salaam ambaye ni Mkuu wa Idara ya Utumishi na Usimamizi wa Rasilimali watu Bi.Tabia Nzowa amesema ushirikiano baina ya Manispaa ya Singida na Jiji la Dar es salaam una lengo la kubadilishana uzoefu baina ya pande hizi mbili.

Mradi wa ujenzi wa jengo la kibiashara la DDC linalojengwa eneo la Kariakoo wenye ghorofa sita unatekelezwa na mbia kampuni ya Tosh Logistics Company una gharama ya Shilingi bilioni 37 unatarajiwa kukamilika ndani ya mwaka mmoja toka kuanza kwa ujenzi wake.