Madiwani na Watumishi kutoka Manispaa ya Mjini Zanzibar wafanya ziara ya mafunzo Jiji la DSM

Tarehe iliyowekwa: August 25th, 2023

Halmashauri ya Jiji la Dar es Salaam ni moja kati ya Majiji yanayofanya vizuri katika udhibiti wa mapato yanayotokana na malipo ya maegesho kutokana na mfumo unaotumika.

Hayo yameelezwa na Diwani wa Manispaa ya Mjini Zanzibar Mhe. Amour Mmanga Leo Agosti 26, 2023 wakati wa ziara ya kimafunzo ya siku moja Jijini Dar es Salaam kujifunza jinsi Halmashauri ya Jiji la Dar es Salam inavyokusanya mapato hususani eneo la maegesho.

Akiwa ameambatana na baadhi ya waheshimiwa madiwani na wataalam kutoka Baraza la Mjini Zanzibar, waliweza kutembelea maeneo ya maegesho ya magari eneo la Kitumbini barabara ya Jamuhuri ambapo walipata maelezo jinsi ya kutumia mfumo wa ukusanyaji wa mapato hayo.

"Tumeamua kuja kujifunza Halmashauri ya Jiji kwa sababu wenzetu mmepiga hatua kubwa sana katika kudhibiti upoteaji holela wa mapato ambapo tunaamini endapo tutafanya hivi basi tutakusanya mapato zaidi". Alisema Mhe. Mmanga.

Ziara hii ni muendelezo wa ziara nyingine za mafunzo zinazofanywa na baadhi ya Halmashauri hapa nchini kuja kujifunza namna Halmashauri ya Jiji la Dar es Salaam inavyofanya kazi katika utekelezaji na usimamizi wa miradi mbalimbali ya Maendeleo.