Madiwani wa Jiji wakagua utekelezaji wa miradi ya maendeleo

Tarehe iliyowekwa: August 24th, 2018

Mstahiki Meya wa Jiji la Dar es Salaam Mhe. Isaya Mwita Charles leo tarehe 24 Agosti, 2018 amewaongoza Wajumbe wa Baraza la Madiwani wa Jiji pamoja na timu ya Menejimenti ya Halmashauri ya Jiji la Dar es Salaam katika ziara ya ukaguzi wa utekelezaji wa miradi ya maendeleo jijini Dar es Salaam.

Miradi iliyotembelewa katika ziara hiyo ni mradi wa barabara ya kuingia ndani ya dampo la Pugu Kinyamwezi yenye urefu wa kilometa 0.7 iliyojengwa kwa kiwango cha zege ili kuhakikisha inapitika katika vipindi vyote vya mwaka pamoja na mradi wa choo cha umma cha kulipia kilichopo katika  Soko la Ilala Boma (DRIMP).

Wajumbe hao wa Baraza la Madiwani wa Jiji wamepongeza Menejimenti ya Halmashauri ya Jiji la Dar es Salaam kwa kazi nzuri iliyofanyika na kuwataka kuendelea kuboresha na kuongeza ubunifu katika uanzishaji wa vyanzo vipya vya mapato kwa lengo la utoaji wa huduma bora kwa wananchi na utekelezaji wa miradi ya maendeleo.