Waziri Mkuu atembelea Kariakoo, atoa maagizo mmiliki wa jengo akamatwe

Tarehe iliyowekwa: November 18th, 2024

Na Shalua Mpanda 

Waziri Mkuu Mhe. Kassim Majaliwa leo Novemba 18, 2024 ametembelea eneo la Kariakoo lilipoanguka ghorofa na kusababisha vifo na majeruhi kadhaa na kutoa agizo la kukamatwa kwa Mmiliki wa jengo hilo.

Mhe. Waziri Mkuu amegiza vyombo vya dola kumsaka popote alipo Mmiliki huyo ili aweze kutoa ufafanuzi kwa nini jengo hilo lenye ghorofa nne limeanguka.

“Naagiza mmiliki wa hili jengo atafutwe popote alipo akamatwe aje atueleze kwa nini jengo hili limeanguka na ataeleza mbele ya Kamati ambayo imeundwa ya uchunguzi wa tukio hilo”. Alisisitiza.

Katika hatua nyingine, Waziri Mkuu Majaliwa ameongoza mamia ya wananchi katika viwanja vya Mnazi mmoja kuaga miili ya watu 15 waliofariki katika ajali hiyo iliyotokea Novemba 16.

Zoezi la uokoaji linaendelea katika eneo hilo na Serikali imetangaza kugharamia mazishi ya waliopoteza maisha na kugharamia gharama za matibabu kwa majeruhi wa tukio hili.