Ziara ya ukaguzi wa mradi wa kuhimili athari za mabadiliko ya tabia nchi pamoja na kuboresha maeneo ya fukwe katika Jiji la Dar es Salaam

Tarehe iliyowekwa: April 19th, 2017

Mstahiki Meya wa Jiji la Dar es Salaam, Isaya Mwita Charles akiwa na wajumbe wa Kamati ya Mipangomiji, Mazingira na Usafirishaji wa Halmashauri ya Jiji la Dar es Salaam na timu ya Menejimenti wamefanya ziara ya kukagua mradi wa kuhimili athari za mabadiliko ya tabia nchi pamoja na kuboresha maeneo ya fukwe katika Jiji la Dar es Salaam.

Mradi wa kuhimili athari za mabadiliko ya tabia nchi pamoja na kuboresha maeneo ya fukwe kwa lengo la kuzuia mmomonyoko ni jitihada zinazofanywa na Serikali ya Jamhuri ya Muungano wa Tanzania kwa lengo la kuzuia mmomonyoko wa udongo katika kingo za bahari ya Hindi katika maeneo ya barabara ya Barack Obama (Ocean Road) na Chuo cha Mwalimu Nyerere kwa upande wa Kigamboni.

Mradi wa huu wa kuta za mita 820 katika fukwe za bahari na mifereji ya maji unatekelezwa kupitia Programu ya Umoja wa Mataifa inaloshughulika na Mazingira “United Nations Environmental Programme” chini ya “United Nations Office for Project Services, Nairobi Operational Hub” na kusimamiwa na  Ofisi ya Makamu wa Rais-Jamhuri ya Muungano wa Tanzania na Halmashauri ya Jiji la Dar es Salaam.

Mradi huu unaotarajiwa kukamilika mwezi Juni, 2017 utazikinga kingo za bahari na mabadiliko ya tabia nchi sambamba na:

• Kuzilinda barabara pembozoni mwa fukwe
• Kuwa na mitaro imara ya kupitisha maji
• Kuwa na maeneo nadhifu ya kupumzikia na kukuza utalii
• Kuwa na vyoo vya umma ndani ya eneo la mradi