"Jitokezeni kupata matibabu na upasuaji wa mabusha bure" - DC Mtambule

Posted on: January 8th, 2026

Na: Shalua Mpanda

Wakazi wa Mkoa wa Dar es Salaam na Mikoa ya jirani, wametakiwa kujitokeza kwa wingi katika zoezi la uchunguzi na upasuaji wa mabusha ulioanza rasmi Januari 5,2026,katika halmashauri za mkoa huo.

Akizungumza na waandishi wa habari kwa niaba ya Mkuu wa mkoa wa Dar es Salaam Mhe. Albert Chalamila, Mkuu wa wilaya ya Kinondoni Mhe. Saad Mtambule amesema Serikali imegharamia matibabu hayo hivyo wananchi hawana budi kujitokeza katika maeneo yao.

Ameyataja baadhi ya maeneno ambayo huduma hiyo ya uchunguzi na upasuaji inatolewa hadi Januari 30 ni vituo vya afya Kinondoni wilaya ya kinondoni na Kilakala kilichopo wilayani Temeke.

"Tumieni siku hizi 25 zilizotolewa na Wizara ya Afya kwenda kwenye vituo hivi, wataalamu wapo wa kutosha na siku ni nyingi, wafahamisheni ndugu na jamaa wakapate huduma hii". Alisisitiza Mhe. Mtambule

Kampeni hii kwa mkoa wa Dar es Salaam inalenga kuwafikia watu 500 ambapo mpaka sasa zaidi ya watu 160 wameshafanyiwa uchunguzi na 127 kati yao wamepangiwa tarehe za kufanyiwa upasuaji