Eneo Maalum la Usafi Jijini

Halmashauri za Mkoa wa Dar es Salaam zinatarajia kuanzisha eneo maalum la usafi wa mazingira (Smart Area) ikiwa ni sehemu ya juhudi za mamlaka hizo za kuliweka Jiji katika mazingira safi, kuwezesha wananchi kushiriki kimilifu katika shughuli za usafi na kutunza mazingira yao kama suluhisho la kudumu la kuepuka magonjwa ya mlipuko kama kipindupindu na daima kuliweka Jiji safi.

Katika utekelezaji wa mpango huo utakaoratibiwa na Ofisi ya Katibu Tawala Mkoa wa Dar es Salaam na kutekelezwa na Halmashauri ya Jiji la Dar es Salaam, Halmashauri ya Manispaa ya Kinondoni, Temeke na Ilala wananchi watapaswa kushiriki kikamilifu kwa kutambua, kuzingatia na kukubali kwamba:

• Ni marufuku kwa biashara zisizo rasmi kufanyika katika Smart Area
• Ni marufuku kwa bodaboda, guta na mikokoteni kuingia Smart Area
• Ni marufuku kuwa na majengo chakavu/mabovu katika Smart Area
• Ni marufuku kutupa taka ovyo katika Smart Area
• Ni marufuku kutumia maeneo yasiyo rasmi kukusanya taka
• Ni marufuku kwa Ombaomba  kufanya shughuli zao katika Smart Area
• Ni marufuku kwa wamachinga kufanya biashara zao katika Smart Area
• Ni marufuku kufanya na kupanga biashara zilizosajiliwa nje ya maduka
• Ni marufuku kuwasha moto na kupika katika maeneo yasiyo rasmi
• Ni marufuku kuwa na gereji bubu katika Smart Area
• Ni marufuku kuwa na “Show rooms” za magari  katika makazi ya watu
• Ni marufuku kuegesha magari ovyo katika Smart Area
• Ni marufuku kujisaidia ovyo katika Smart Area
• Ni marufuku kutema mate ovyo
• Ni marufuku kuwa na mabango yaliyochakaa kwenye vituo vya mabasi
• Ni marufuku kutumia nyumba au majengo yasiyowekewa “pavement”
• Ni marufuku kuweka matangazo bila kibali maalumu katika Smart Area
• Ni marufuku kuwa na mfumo wa majitaka katika mifereji ya maji mvua
• Ni marufuku kuosha magari katika maeneo yasiyo rasmi
• Ni marufuku kupiga kelele katika eneo maalumu bila kibali
• Ni marufuku malori zaidi ya tani 10 kuingia Smart Area bila kibali

Katika utekelezaji wa mpango huo, maeneo yafuatayo yamepangwa kuwa Smart Area wakati maeneo mengine yataendelea kuwa chini ya usimamizi wa karibu wa Halmashauri za Manispaa katika kuimarisha usafi wa mazingira:

• Barabara ya Kawawa: Kuanzia makutano ya Barabara ya Kawawa na Uhuru hadi makutano ya Barabara ya Kawawa na Ali Hassan Mwinyi (Morocco)
• Barabara ya Ali Hassani Mwinyi: Kuanzia makutano ya Morocco hadi Salenda Bridge, maeneo ya fukwe na makutano ya Barabara Kilwa na Mandela (Uhasibu), kuelekea makutano ya Barabara ya Nyerere na Mandela (Tazara)
• Barabara ya Nyerere: Kuanzia makutano barabara ya Nyerere na Mandela (Tazara) hadi makutano ya Barabara ya Kawawa na Uhuru.
• Maeneo ya vivutio vya watalii hususan fukwe
• Barabara zinazotumika kwa ajili ya mapokezi ya wageni (hususan viongozi) wa nje ya nchi: Barabara ya Nyerere kuelekea Uwanja wa Ndege wa Kimataifa wa Julius Nyerere, Barabara ya Mwai Kibaki hadi Hoteli ya Whitesands kupitia Barabara ya Mbezi Chini.
• Barabara ya Morogoro na Barabara zote za Mradi wa Mabasi yaendayo Haraka (Dar es Salaam Rapid Transit(DART)

Madhumuni ya mpango huo ni kuwa na usimamizi madhubuti wa sheria, kanuni na taratibu za uendashaji miji ili kuliondoa Jiji katika changamoto za muda mrefu zinazosababishwa na uchafu. Jambo la msingi zaidi ni kwamba eneo hili litawekwa miundombinu madhubuti itakayorahisisha utoaji wa huduma mbalimbali za kijamii, kiuchumi na kutokomeza magonjwa ya mlipuko yanayoathiri maisha na maendeleo ya wakazi wa Dar es Salaam.