Kamati ya Ukaguzi wa Miradi ya Mkoa yatembelea miradi ya Halmashauri ya Jiji la Dar es Salaam

Tarehe iliyowekwa: August 29th, 2018

Kamati ya Ukaguzi wa Miradi ya Mkoa wa Dar es Salaam leo tarehe 29 Agosti, 2018 imefanya ziara ya kutembelea Miradi ya Maendeleo ya Halmashauri ya Jiji la Dar es Salaam kwa lengo la kukagua utekelezaji wa miradi hiyo jijini Dar es Salaam.

Miradi iliyotembelewa na Kamati hiyo ni; Mradi wa choo cha umma cha kulipia kilichopo katika Soko la Ilala Boma (DRIMP), ujenzi wa miundombinu ya viwanda vidogo vidogo awamu ya pili ambayo inahusisha ujenzi wa mgahawa, vyoo vya umma na maduka ya biashara katika eneo la Mwananyamala jijini Dar es Salaam ili kuwawezesha wajasiriamali kuboresha ustawi wa maisha yao.

Kamati pia imekagua ujenzi wa madarasa 7, vyoo na ofisi ya walimu katika shule ya Sekondari ya Benjamin William Mkapa kwa lengo la kuwawezesha wanafunzi kupata elimu katika mazingira rafiki ya kujifunzia.

Halmashauri ya Jiji la Dar es Salaam inaendelea kuboresha miundombinu ya huduma mbalimbali ili kuweza kutoa huduma bora kwa wakazi wote jijini Dar es Salaam.