Wafanyakazi wa Halmashauri ya Jiji la Dar es Salaam waungana na wenzao Duniani kusheherekea Mei Mosi

Tarehe iliyowekwa: May 1st, 2017

Wafanyakazi wa Halmashauri ya Jiji la Dar es Salaam leo tarehe 1 Mei, 2017 wameungana na wafanyakazi wenzao duniani katika kusherekea Siku ya Wafanyakazi Duniani. Siku ya hii kwa Tanzania hujulikana kama Siku ya Wafanyakazi Duniani yaani  Mei Mosi, inasherehekewa kila mwaka tarehe 1 Mei.

Sherehe za Mei Mosi kwa Jiji la Dar es Salaam mwaka 2017 zilianza kwa maandamano ya wafanyakazi kutoka sekta mbalimbali za binafsi na umma kuanzia Ofisi za TUCTA Makao Makuu zilizopo Mnazi Mmoja kuelekea katika Uwanja wa Uhuru na kupokelewa na mgeni rasmi Mhe. Magreth Sitta (Mb).

Maadhimisho ya Mei Mosi mwaka 2017 kitaifa yamefanyika katika uwanja wa mpira wa Chuo cha Ushirika Mjini Moshi Mkoani Kilimanjaro mbele ya mgeni rasmi, Rais wa Jamhuri ya Muungano wa Tanzania, Dkt. John Pombe Magufuli ambaye alipokea maandamano ya wafanyakazi kutoka sekta mbalimbali nchini za binafsi na umma.

Kauli mbiu ya Mei Mosi mwaka 2017 inasema "UCHUMI WA VIWANDA UZINGATIE KULINDA HAKI NA HESHIMA YA WAFANYAKAZI". Kauli mbiu hii inazingatia utu wa wafanyakazi hasa katika kipindi hiki tunachoelekea katika mabadiliko makubwa ya uchumi wa viwanda dhana ambayo Tanzania ya viwanda inatuelekeza kuwa.