Ukaguzi wa mafunzo kazi ya utengenezaji na usimamizi wa tovuti za Serikali

Tarehe iliyowekwa: March 25th, 2017

Mkurugenzi wa Idara ya Habari Maelezo na Msemaji Mkuu wa Serikali Dkt. Hassan Abbas, akiongozana na Mkurugenzi msaidizi wa miundombinu ya TEHAMA kutoka Ofisi ya Rais, Tawala za Mikoa na Serikali za Mitaa, Bw. Baltazar Kibola amekagua mafunzo kazi yanayotolewa kwa Maofisa Habari na Maafisa TEHAMA kutoka mikoa na Halmashauri za mikoa ya Dodoma, Singida, Iringa, Geita, Pwani, Manyara na Dar es Salaam yanayofanyika katika ukumbi wa Royal Village mkoani Dodoma.

Mradi wa Uimarishaji Mifumo ya Sekta za Umma (PS3) kwa kushirikiana na Ofisi ya Rais, Tawala za Mikoa na Serikali za Mitaa pamoja na Wakala ya Serikali Mtandao wamesanifu Mfumo wa pamoja utakaosaidia kutengeneza na kusimamia tovuti za Serikali ambazo zitakuwa na kiwango na muonekano mmoja ambao ni rahisi wakati wa kufanya maboresho.

Lengo la mafunzo kazi hayo ni kuwajengea uwezo Maofisa Habari na TEHAMA ili taarifa mbalimbali zinazohusu Serikali ziweze kuwafikia wananchi kwa usahihi na kwa wakati. Dkt. Hassan Abbas ameweka wazi sifa tano za Maofisa Habari na TEHAMA wa Serikali kwa nyakati hizi kuwa ni:

1. Kuwa na ufanisi katika kazi na kujituma katika kutangaza taarifa mbalimbali za mafanikio na huduma zinazotolewa na Serikali kwa wananchi
2. Kuwa wabunifu kwa kutumia fursa za TEHAMA katika kutangaza taarifa za maendeleo kwa wananchi
3. Kuzingatia muda kwa kuhakikisha kwamba taarifa sahihi zinapatikana kwa wakati sahihi
4. Kufanya kazi kwa ushirikiano
5. Kuwa wazalendo kwa kumsaidia Rais wa Jamhuri ya Muungano wa Tanzania, Mhe. Dkt. John Pombe Magufuli katika kutangaza taarifa za maendeleo na mafanikio ya Serikali kwa wananchi.

Dkt. Hassan Abbas amesisitiza kwamba Maafisa habari wa Serikali kote nchini moja ya vigezo vitakavyo tumika kuwapima katika utendaji wao wa kazi ni pamoja na upatikanaji wa taarifa mbalimbali zilizohuishwa katika tovuti zao.

Washiriki wa mafunzo hayo wameipongeza Serikali na Mradi wa Uimarishaji Mifumo ya Sekta za Umma (PS3) kwa kuwawezesha kupata ujuzi na stadi mpya za utengenezaji na uendeshaji wa tovuti za Serikali.