Wilaya ya Ilala yazindua chanjo ya Polio ya matone awamu ya tatu.

Tarehe iliyowekwa: September 1st, 2022

Na Neema Njau

Mkuu wa Wilaya ya Ilala Mhe  Ng’wilabuzu Ludigija  leo tarehe 1 Septemba 22  amezindua chanjo ya Polio ya matone awamu ya tatu katika hospitali ya Mnazi Mmoja iliyopo katika Halmashauri ya Jiji la Dar es Salaam.
Akizindua chanjo hiyo Amewapongeza wazazi wote waliojitokeza kwa wingi kuwaleta watoto wenye umri chini ya miaka mitano kupata chanjo hiyo.
Aidha  Mkuu wa Wilaya amewahamasisha wananchi kuwapa ushirikiano  watoa huduma za afya wanaopita nyumba kwa nyumba pamoja na vituo vyote vya kutolea huduma za afya ili watoto waweze kupata chanjo na kukingwa dhidi ya ugonjwa wa kupooza ambao hauna tiba.
Naye Mganga Mkuu wa Jiji la Dar es Salaam Dr Elizabeth Nyema  ameeleza kuwa Halmashauri imejipanga vizuri kwa zoezi la chanjo ya Polio ya  matone kwa kata zote 36 na mitaa 159 ambapo kuna jumla ya wahudumu 1287 wanatoa huduma hii.
Mganga Mkuu ameweza kutembelea Kituo cha Afya Kipawa ambapo ameridhishwa na mwitikio wa utoaji chanjo ya Polio ya Matone ambapo hadi muda aliotembelea kituo hicho watoto 112 walikua tayari wamepatiwa chanjo.
Aidha ameweza kupita kwa baadhi ya watoa huduma nyumba kwa nyumba na kushughudia mwitikio na watoto wakipatiwa chanjo hiyo inayotolewa bure bila malipo.
Zoezi hili la chanjo linafanyika kuanzia leo tarehe 1 hadi 4 Septemba, 2022 .