Ziara ya Mhe. George Simbachawene (Mb) katika vitega uchumi vya Halmashauri ya Jiji

Tarehe iliyowekwa: May 26th, 2017

Waziri wa Nchi, Ofisi ya Rais, Tawala za Mikoa na Serikali za Mitaa Mhe. George Simbachawene (Mb) leo tarehe 26 Mei, 2017 akiwa ameongozana na Mstahiki Meya wa Jiji la Dar es Salaam, Mhe. Isaya Mwita Charles, Mkurugenzi wa Halmashauri ya Jiji la Dar es Salaam Bi. Sipora J. Liana pamoja na timu yake ya Menejimenti amefanya ziara ya kutembelea vitega uchumi vya Halmashauri ya Jiji la Dar es Salaam vya Shirika la Masoko Kariakoo na Shirika la Uchumi la Jiji la Dar es Salaam(DDC).

Mhe. Waziri alipokea taarifa za utekelezaji na changamoto mbalimbali kutoka katika mashirika tajwa na kuagiza yafuatayo:

1. Utekelezaji wa Sheria ya Bunge Na: 36 ya mwaka 1974 iliyoanzisha Shirika la Masoko Kariakoo kama ilivyofanyiwa marekebisho mwaka 1985 ikiwa na madhumuni ya kusimamia uendeshaji wa Soko la Kariakoo na kuanzishwa kwa masoko mengine ndani ya Jiji la Dar es Salaam, kutoza ushuru wa mazao mbalimbali yanayoingia katika Jiji na kusimamia usafi na ulinzi wa masoko yake.
2. Utekelezaji wa  Sheria Na: 16 iliyoanzisha Shirika la Uchumi la Jiji la Dar es Salaam chini ya Mashirika ya Maendeleo ya Wilaya kwa madhumuni ya kufanya biashara za jumla na rejareja pamoja na uwakala, kufanya biashara ya mahoteli, migahawa, baa na kumbi za burudani, kujenga majengo ya biashara kwa lengo la kupangisha, kuendeleza maeneo ya Shirika.
3. Ulipaji wa kodi za majengo ya Shirika la Masoko Kariakoo pamoja na Shirika la Uchumi la Jiji la Dar es Salaam viendane na viwango vya sasa vya soko na wananchi na wapangaji waelezwe ili waweze kujiandaa na mabadiliko ambayo lengo lake ni kuboresha huduma mbalimbali zinazotolewa na mashirika hayo ili yawe endelevu.
4. Taarifa ya historia za mali za mashirika tajwa tangu yanaanzishwa mwaka 1971 ikieleza mali hizo zipo wapi na zina changamoto gani iandaliwe na iwasilishwe ofisini kwake.
5. Uandaliwe Mpango Mkakati wa Shirika la Masoko Kariakoo pamoja na Shirika la Uchumi la Jiji la Dar es Salaam(DDC).

Mhe. Simbachawene pia amepongeza hatua za kinidhamu zilizochukuliwa kwa watumishi waliobainika kuwa na makosa na kulitaka Shirika la Masoko Kariakoo kubadilika na kuwa na mtazamo mpya badala ya kutegemea kutoza ushuru wa mazao mbalimbali yanayoingia katika Jiji sambamba na kusimamia uanzishwaji wa masoko mengine ndani ya Jiji la Dar es Salaam huku likiwashirikisha wenye hisa(Halmashauri ya Jiji la Dar es Salaam na Serikali Kuu).

Aidha, Mhe. Simbachawene amesisitiza kwamba Shirika la Uchumi la Jiji la Dar es Salaam(DDC) litafute na kuendeleza maeneo ya kupumzika na burudani pamoja na kujenga kumbi za sherehe na mikutano mbalimbali na kuweza kutoa ajira kwa Watanzania na pia kutekeleza lengo la Sheria iliyolianzisha Shirika hilo.

Mhe. George Simbachawene (Mb) akimsikiliza mfanyabiashara ndani ya Soko la Kariakoo