Uzinduzi wa Mradi wa Maboresho ya Mtaa wa Samora

Posted on: August 16th, 2017

Mkuu wa Mkoa wa Dar es Salaam, Mhe. Paul Makonda leo tarehe 16 Agosti, 2017 amezindua Mradi wa Maboresho ya Mtaa wa Samora katika Jiji la Dar es Salaam na kuukabidhi kwa Halmashauri ya Manispaa ya Ilala. 

Mradi huo ambao umefadhiliwa na Serikali ya Japan kupitia Shirika lake la Kimataifa la Maendeleo "Japan International Cooperation Agency (JICA)" umeratibiwa na Halmashauri ya Jiji la Dar es Salaam kwa kushirikiana na Halmashauri ya Manispaa ya Ilala pamoja na JICA.

Mradi huo ambao ulianza kutekelezwa mwezi Desemba, 2016 na kukamilika mwezi Agosti, 2017 ulikuwa na madhumuni ya kuboresha miundombinu itakayosaidia kuimarisha usalama barabarani, kuwa na eneo bora la wananchi, wageni na watalii kupumzikia. Aidha, mradi huo ulikuwa na madhumini pia ya kuboresha maeneo ya maegesho ya magari, bustani na kuimarisha utunzaji wa mazingira katika maeneo ya Barabara ya Samora.

Mradi huo umekuwa ni mfano (Pilot Project) kwa ajili ya kuboresha miundombinu ya mitaa mbalimbali katika Jiji la Dar es Salaam ambapo wataalam wa JICA na taasisi zinazosimamia na kuratibu usafiri jijini Dar es Salaam wameandaa kitabu cha mwongozo wa maboresho ya mitaa katika Jiji la Dar es Salaam (Dar es Salaam - Urban Design Manual) kitakacholiwezesha Jiji kuwa na miundombinu bora zaidi ya usafiri. 

Jiji la Dar es Salaam litaendelea kutekeleza miradi ya aina hiyo katika maeneo mbalimbali ya Jiji kwa kushirikiana na wadau mbalimbali pamoja na wafadhili kama JICA.

Bonyeza hapa kuangalia picha zaidi za uzinduzi wa Mradi wa Maboresho ya Mtaa wa Samora.