"Tendeni haki katika kutoa mikopo" - Mhe. Zungu

Tarehe iliyowekwa: November 12th, 2024

Na: Shalua Mpanda 

Naibu Spika wa Bunge la Jamhuri ya Muungano na Mbunge wa Jimbo la Ilala Mheshimiwa Mussa Azzan Zungu ametumia Kongamano la Wajasiriamali kutoa maelekezo kwa maafisa Maendeleo ya Jamii kutenda haki katika kutoa mikopo ya asilimia 10 inayotolewa na Halmashauri ya Jiji la Dar es Salaam.

Mhe. Zungu amesema lengo la mikopo hiyo ni kuwakwamua wanawake, vijana na watu wenye ulemavu kiuchumi hivyo Maafisa hao hawana budi kutenda haki na kuhakikisha wale wote wenye vigezo wanapata mikopo hiyo.

"Kuna baadhi ya Maafisa Maendeleo ya Jamii hawatendi haki kwenye kutoa mikopo hiyo na hilo limekuwa likiwaletea changamoto sana wananchi,hivyo niwatake maafisa Maendeleo ya Jamii mtende haki kwenye hili". Alisisitiza Mhe. Zungu

Awali akitoa maelezo kuhusu mikopo hiyo ya asilimia 10 ambayo hutolewa kwa makundi hayo matatu, Mkurugenzi wa Jiji la DSM Elihuruma Mabelya amesema Jiji hilo limetenga kiasi Shilingi Bilioni 14 kwa ajili ya kuwezesha wajasiriamali kutoka Kata ote 36 za Halmashauri ya Jiji la Dar es Salaam.