Kamati ya Uwekezaji, Viwanda na Biashara yakagua maeneo yanayotarajiwa kufanyiwa uwekezaji

Posted on: October 31st, 2023

Kamati ya Uwekezaji, Viwanda na Biashara imefanya ziara ya ukaguzi wa maeneo ya uwekezaji yanayosimamiwa na Halmashauri ya Jiji la Dar es Salaam ambapo Leo tarehe 31 Oktoba, 2023 Kamati hiyo imetembelea maeneo matatu ya nyumba za watumishi yaliyopo Masaki.

Akiongea katika ziara hiyo Mwenyekiti wa Kamati Mhe. Ojambi Masaburi amesema "Kamati hii ni mahususi kwa kubainisha maeneo ambayo ni fursa na vitega uchumi vya Halmashauri, kwani Halmashauri yetu ina maeneo mengi na makubwa ambayo tukiyatumia vizuri katika uwekezaji yatasaidia kuingiza mapato katika Halmashauri yetu ambayo yatasaidia kuboresha miundombinu na kujenga barabara, shule, hospitali."

Sambamba na hayo, Mhe. Masaburi amesema Halmashauri ya Jiji la DSM inaenda kufanya uwekezaji katika sekta mbalimbali na kuwataka wawekezaji wa ndani na nje ya nchi kukaa mkao wa kuwekeza kwani kupitia Kamati hii maeneo mengi ya uwekezaji yatabainishwa.

Aidha, Kamati imeagiza Halmashauri kubainisha maeneo yote ambayo yanatarajiwa kufanyiwa uwekezaji Ili Kamati iweze kupendekeza vitegauchumi vitakavyokua na maslahi kwa Halmashauri na Taifa kwa ujumla.