“Nendeni mkatoe huduma bora kwa wananchi” - Mhe. Mpogolo

Posted on: November 28th, 2024

Mkuu wa Wilaya ya Ilala Mhe. Edward Mpogolo ametoa wito kwa wenyeviti na wajumbe wa Serikali za Mitaa waliochaguliwa  katika Uchaguzi wa Serikali za Mitaa uliofanyika tarehe 27 Novemba 2024 kwenda kutoa huduma bora kwa wananchi na si kuwauzia.

Ameyasema hayo leo tarehe 28 Novemba ,2024 katika zoezi la uapishaji wa wenyeviti na wajumbe wa Serikali za Mitaa 2024,   limefanyika  katika ukumbi wa mikutano Anartoglou Jijini Dar es salaam.

Mhe. Mpogolo amesema “Napenda kutumia nafasi hii kutoa wito kwenu , mmechaguliwa na wananchi hivyo nendeni mkawatumikie kwa kutoa huduma bora na sio kuwauzia huduma , wananchi wana imani na nyinyi na ndio maana wamewachagua  hivyo mkatende haki kwani kiongozi anayetenda haki  eneo lake linakuwa na amani na utulivu”

Sambamba na hilo, Mhe. Mpogolo amesema kuwa Halmashauri yetu ni miongoni mwa Halmashauri zenye mitaa mingi, hata hivyo uchaguzi ulitamatika kwa amani pasipo vurugu wala vinyongo, hivi nampongeza sana Mkurugenzi wa Jiji la Dar es Salaam ambaye pia ni  msimamizi mkuu wa Uchaguzi  na timu yake kwa ujumla  kwa kutii wito wa Rais wa Jamhuri ya Muungano wa Tanzania kwakusimamia zoezi  zima la Uchaguzi kwa haki,utulivu na weledi.

Kwa upande wake Mstahiki Meya Mhe. Omary Kumbilamoto amewataka viongozi hao kwenda kusimamia miradi iliyopo katika mitaa yao kwa maendeleo ya mitaa yao na taifa kwa ujumla.

Naye Mkurugenzi wa Jiji la Dar es salaam Ndg . Elihuruma Mabelya amewasisitiza viongozi hao kuhakikisha wanafanya kazi kwa kuzingatia falsafa ya 4R (Reconciliation, Reforms, Resilience na Rebuild) ya Mhe. Rais wa Jamuhuri ya Muungano wa Tanzania Dkt. Samia Suluhu Hassan ili kkufanya kazi ya kuwahudumia wananchi kwa haki na uzalendo kwa maslahi ya Jiji na Nchi kwa ujumla.

Halikadhalika, Wenyeviti na Wajumbe wa Serikali za Mitaa  wamekula kiapo cha uaminifu, utii , katika kutimiza majukumu yao na kuwatendea haki watu wote kwa mujibu wa sheria.