RC Makonda awakaribisha viongozi wapya jijini Dar

Posted on: August 3rd, 2018

Mkuu wa Mkoa wa Dar es Salaam Mhe. Paul C. Makonda leo tarehe 03 Agosti, 2018 amewapokea na kuwakaribisha viongozi wapya walioteuliwa pamoja kuwaaga waliohamishwa vituo vingine vya kazi. RC Makonda akizungumza katika hafla hiyo mbele ya viongozi wa Chama na Serikali kutoka Jiji la Dar es Salaam amewakaribisha Katibu Tawala Mkoa pamoja na Wakuu wa Wilaya za Kinondoni na Kigamboni na amewataka viongozi na watendaji wote kufanya kazi kwa kushirikiana huku wakizingatia majukumu na wajibu wa kila mmoja ili kuweza kuwaletea wananchi wa Dar es Salaam na Watatnzania wote kwa ujumla maendeleo.

Aidha RC Makonda amemtaka Katibu Tawala wa Mkoa, ndugu Aboubakar M. Kunenge kusimamia upatikanaji wa takwimu sahihi unaozingatia sheria na kuhakikisha Mkoa unatumia vyema fursa za Teknolojia ya Habari na Mawasiliano (TEHAMA) katika ukusanyaji na usimamizi wa mapato ya Serikali na utoaji wa huduma bora kwa uwazi, wakati na kwa ufanisi.

Kwa upande wake, Kunenge ametoa ahadi ya kushirikiana na watendaji wote walio katika Sekretarieti ya Mkoa, Mamlaka za Serikali za Mitaa za Jiji la Dar es Salaam, wananchi na wadau wote ili kuweza kutimiza azma ya Rais Dkt. John Magufuli ya kuwaletea Watanzania maendeleo.