Watendaji, Viongozi Halmashauri ya Mji Njombe Watembelea Jiji la Dar es Salaam

Posted on: July 3rd, 2019

Mwenyekiti wa Halmashauri ya Mji wa Njombe Mheshimiwa Edwin Mwanzinga leo tarehe 3 Julai, 2019 akiwa ameongozana na Waheshimiwa Madiwani, Kamati ya Ulinzi na Usalama ya Wilaya pamoja na baadhi ya Watendaji kutoka Halmashauri ya Mji wa Njombe wamefanya ziara ya kujifunza  namna ya uendeshaji  wa Kituo Kikuu cha Mabasi Ubungo.

Wageni hao pia wamepata fursa ya kutembelea eneo la Mbezi Luis na kujionea maendeleo ya ujenzi wa miundombinu ya Kituo cha Kimataifa cha Mabasi yaendayo mikoani na nchi jirani kinachojengwa kwa fedha za Serikali Kuu kiasi cha shilingi 50,689,000,000.00.

Mheshimiwa Mwenyekiti pamoja na timu aliyoongozana nayo wameipongeza Halmashauri ya Jiji la Dar es Salaam kwa kazi nzuri ya ukusanyaji mapato katika Kituo cha Mabasi Ubungo na namna ya utendaji wa kazi unavyofanyika katika kituo hicho.

Aidha ametoa pongezi za dhati kwa Mkurugenzi wa Halmashauri ya Jiji na timu yake ya Menejimenti kwa kusimamia vizuri ujenzi wa Kituo kipya cha Mabasi katika eneo la Mbezi Luis kinachotarajia kukamilika mwezi Julai, 2020.