Watumishi Jiji wachagua wawakilishi TALGWU

Posted on: July 18th, 2018

Watumishi wa Halmashauri ya Jiji la Dar es Salaam leo tarehe 18 Julai, 2018 wamefanya uchaguzi wa nafasi zilizokuwa wazi za viongozi wa Chama cha wafanyakazi wa Serikali za Mitaa Tanzania “TALWGU” ngazi ya Tawi.

Uchaguzi huo ulioratibiwa na kusimamiwa na uongozi wa TALGWU wa mkoa wa Dar es Salaam umefanyika katika ofisi za Halmashauri ya Jiji la Dar es Salaam, Makao Makuu.

Lengo la uchaguzi huo ni kuwawezesha watumishi wa Halmashauri ya Jiji la Dar es Salaam kupata uwakilishi wa viongozi ili kuweza kutetea na kulinda haki za wafanyakazi kwa kuzingatia sheria, taratibu, kanuni, miongozo na nyaraka mbalimbali za kazi.

Katika uchaguzi huo Bi. Happy Monyo alichaguliwa kuwa Mwenyekiti wa TALGWU Tawi la Halmashauri ya Jiji la Dar es Salaam na Bw. Patrick Sabuni alichaguliwa kuwa Mjumbe wa Halmashauri ya Tawi katika Halmashauri ya Jiji la Dar es Salaam.

Mbali na uchaguzi wa wawakilishi, watumishi wa Halmashauri ya Jiji la Dar es Salaam pia walipata fursa ya kuelimishwa umuhimu wa hisa, faida zake na kuhamasishwa kuzinunua ili kutunisha mfuko na kuiwezesha taasisi ya kifedha ya TALGWU Microfinance Plc ambayo inatoa mikopo kwa wanachama wake ili kuwawezesha kuinua hali zao za kiuchumi katika nyanja mbalimbali kama kulipia elimu, ujenzi wa nyumba, na mitaji ya biashara.