"Ilala kutumia zaidi ya Bilioni 14 kuwakopesha baba na mama lishe" - DC Mpogolo

Tarehe iliyowekwa: January 27th, 2025

Wakati mkutano wa Wakuu wa nchi za Afrika ambao unalenga kujadili matumizi ya Nishati Safi, ukianza leo hapa Jijini Dar es Salaam, Mkuu wa Wilaya ya Ilala Mhe. Edward Mpogolo amesema Rais Dkt. Samia Suluhu ni Kinara kwenye Matumizi ya Nishati ya Kupikia ambapo ili Kuunga mkono Jitihada zake hizo, Halmashauri ya Jiji la Dar es salaam inakusudia kutumia Takribani Shilingi Bilioni 14 kwa ajili ya kuwakopesha Wajasiriamali, wakiwemo Baba Lishe na Mama Lishe.

DC Mpogolo ametoa Kauli hiyo leo Januari 27, 2025 katika Soko la Samaki Feri wakati alipojumuika na Wasanii kutoka Vikundi vya Samia Queens na Lamata Village kwaajili Kusherehekea Kumbukizi ya Siku ya Kuzaliwa Rais Dkt Samia Suluhu Hassan kwa kugawa Vitendea kazi kwa Jumuiya za Baba na Mama Lishe katika Soko hilo.

"Tunao Baba Lishe na Mama Lishe zaid ya Elfu Nane, ambapo wako katika Maeneo Mbalimbali, Umeona hapa Soko la Feri wapo, Ukienda Kisutu utawakuta pia kila eneo unawakuta, kwa hiyo Sisi kama Halmashauri ya Jiji la Dar es Salaam tunakwenda Kuwakopesha Majiko yanayoendana na Matumizi yao." Amesema Mhe. Mpogolo