Kata ya Kipunguni Halmashauri ya Jiji la DSM wafanya tamasha la maonyesho ya wajasiriamali ambao ni wanufaika wa Asilimia 10% ya mapato ya ndani

Tarehe iliyowekwa: January 27th, 2022

Na. Judith Damas

Uongozi wa Kata ya Kipunguni  kwa kushirikiana  na  Halmashauri ya Jiji la Dar es Salaam kupitia Idara ya Maendeleo ya Jamii leo Januari 27, 2022 wameeandaa tamasha la maonyesho  ya wajasiriamali wa Kata ya Kipunguni yaliyofanyika  katika viwanja vya Moshi Bar Kata ya Kipunguni Jijini Dar es salaam lengo likiwa ni  kutambulisha bidhaa zao na kutoa elimu kwa wajasiriamali wanaofanya biashara na wanaotaka kuanzisha biashara zao ambapo  ni utekelezaji wa Sera ya Taifa ya uwezeshaji Wananchi Kiuchumi ya mwaka 2004.

Akiongea katika tamasha hilo mgeni rasmi ambaye ni Naibu Meya wa Jiji la Dar es Salaam Mhe. Saady Khimji amesema "Kwa niaba ya Mstahiki Meya  Pamoja na Mkurugenzi wa Halmashauri ya Jiji la Dar es Salaam napenda kuwahakikishia wananchi wajasiriamali wa Kata ya Kipunguni Kuwa tutashirikiana nanyi ili kuweza  Kuwawezesha wananchi wetu kujikwamua kiuchumi hususani wanawake, vijana na watu wenye ulemavu. 

Aidha Mhe. Khimji amewapongeza Wajasiriamali wa Kata  ya Kipunguni  kwa kazi nzuri wanazozifanya hivyo amewaomba wajasiriamali  waliopata mkopo waweze kurudisha kwa wakati ili kuwapatia fursa wajasiriamali wengine kupata mkopo na kuendesha biashara zao.

Akitoa taarifa fupi ya vikundi vya Wanawake, vijana na watu wenye ulemavu Afisa maendeleo wa Kata ya Kipunguni Bi. Rozina Soka ameeleza kuwa Kata ya Kipunguni ni miongoni mwa Kata 36 za Halmashauri ya Jiji la Dar es Salaam ambazo zimenufaika na mikopo ya asilimia 10% za mapato ya ndani inayolenga kuwawezesha wanawake, vijana na watu wenye ulemavu kuanzia mwaka 2019 hadi kufikia mwaka 2021.

Aidha Bi.Rozina  ameendelea kusema hadi kufikia Disemba 2021 Kata ya Kipunguni imeweza kusajili vikundi 46 ambavyo vimepokea mkopo wa shillingi milioni 432.5 ambapo vikundi  thelathink (30)  vya wanawake wamepokea shilingi milioni 217 huku vikundi kumi na nne (14) vya vijana vimepokea shilingi milioni 159.5 na vikundi viwili  (2) vya watu wenye ulemavu vimepokea jumla ya shilingi milioni 56. 

Sambamba na hilo Bi Rozina Soka amesema " Tunaishukuru Halmashauri ya Jiji la Dar es Salaam kupitia Idara ya maendeleo ya jamii kwa kutuwezesha kupata mikopo japo kuna changamoto katika ufuatiliaji wa marejesho lakini sisi kama  viongozi tumeandaa mikakati ya ufuatiliaji  ngazi ya kata lengo likiwa ni kuhakikisha fedha zote za mkopo zinarejeshwa kwa wakati na vikundi vingine vinavyoomba mikopo viweze kupatiwa kwa wakati.

Vilevile shillingi milioni 598 inatarajiwa kutolewa kwa vikundi takribani arobaini na moja(41) ambavyo vishajadiliwa kwenye kikao cha kamati ya fedha na mara tu watakapokamilisha  taratibu zilizobaki watapatiwa mkopo huo.

Akitoa wito kwa wananchi   kwa niaba ya wajasiriamali wenzake wa Kata ya Kipunguni Bi. Mboni  Edd Gamuya amesema "Napenda kumshukuru Mkurugenzi wa Halmashauri wa Jiji la Dar es Salaam kwa kuona tija ya kutupatia mkopo  kwani mikopo hii imeweza kutukwamua kiuchumi na pia kwa kiasi kikubwa imeweza kutatua tatizo la ajira kwa vijana wengi.Pia ningependa kutoa wito kwawajasiriamali wenzangu ambao wanasuasua kurejesha mikopo yao warejeshe kwa wakati ili kuwapatia fursa wananchi wengine wanaoomba mikopo waweze kupata mikopo kwa wakati na kuweza kuendesha biashara zao.