Mkuu wa Wilaya ya Ilala amaliza mgogoro wa mpaka Mtaa wa Ngobedi 'B'

Tarehe iliyowekwa: February 21st, 2022

Na: Amanzi Kimonjo & Judith Msuya

Mkuu wa Wilaya wa Ilala Mhe.Ng'wilabuzu Ndatwa Ludigija leo tarehe 21 february 2022 amefanya ziara ya kutembelea  Kata ya Zingiziwa  ambako Wilaya ya Ilala imepakana na Wilaya ya Kisarawe lengo likiwa ni kuweka sawa suala la Mipaka hiyo kwa wananchi wa eneo la Ngobedi 'B'.

Aidha katika ziara hiyo iliyohudhuriwa na Mkuu wa Wilaya ya Ilala, Mkuu wa Wilaya ya Kisarawe, Mkurugenzi wa Halmashauri ya Jiji la Dar es Salaam pamoja na wataalamu wa Mipango miji na ardhi wa Wilaya zote mbili waliweza kujiridhisha na kuazimia kua kutokana na mipaka ya nchi  eneo hilo la Ngobedi 'B' lipo Wilaya ya Kisarawe.

Kwa upande wake Mkuu wa Wilaya ya Ilala Mhe.Ngw'ilabuzu Ludigija amesema "mgogoro huu umekua wa muda mrefu na sisi tumeukuta lakini kwa dhamira njema tumeona tuweke mambo sawa hivyo tumekaa na wataalamu wetu na wamejiridhisha kwamba eneo hili la  Ngobedi 'B' liko Wilaya ya Kisarawe, kwahiyo niwaombe sana wananchi, sisi wakuu wa wilaya hatubadilishi mipaka ya nchi, kazi yetu ni Utawala ili tuweze kuwahudumia wananchi vizuri hivyo mpaka kufikia wiki ijayo wataalamu wetu watakua washaainisha hiyo mipaka na hii itatusaidia zaidi kwenye suala zima la ulinzi na uslama hivyo niwaombeni sana, sisi wakuu wenu wa Wilaya tutaendelea kushirikiana ili muweze kufikiwa na huduma za  Kijamii."

Aidha ziara hiyo haikuishia hapo iliendelea katika Soko la Zingiziwa ambapo Mhe. Ludigija aliweza kuongea na wananchi wa soko hilo lengo likiwa ni kuwaelekeza na kuwakumbusha wote waliorudi kufanya biashara maeneo yasiyo rasmi warudi sokoni  kwani wakirudi sokoni itakua rahisi kufikiwa na huduma za kijamii.

Sambamba na hilo Mhe. Ludigija ametoa maelekezo kwa wafanyabiashara wote wanarudi kufanya biashara Maeneo yasiyo rasmi warudi sokoni kabla hawajachukuliwa hatua. "Kwanza napenda kumshukuru Mkurugenzi wa Jiji la Dar es Salaam kwa fedha alizotoa kwa ujenzi wa soko la zingiziwa hivyo niwaombe wananchi wote wa soko la Zingiziwa  wanarudi kufanya biashara maeneo ya barabarani warudi sokoni hivyo niwaombe sana tufanye biashara hapa sokoni bila kurudi barabarani tusingependa sisi Serikali kuumiza wananchi wetu kwakutumia nguvu hivyo tunawaomba mfanye biashara sokoni kwani fedha zinazotolewa kwaajili ya kujenga masoko zinatolewa kusudi wafanyabiashara wetu mfanye biashara sehemu rasmi na salama pia kama mnataka kujenda frame wenyewe muwasiliane na Kamati ya maendeleo ya Kata ya Zingiziwa ili mpatiwe ramani mjenge na mfanye biashara  zenu kwa uhakika zaidi." amesema Mhe. Ludigija.

Akiongea kwa niaba ya wananchi wa Kata ya Zingiziwa  Diwani wa Kata ya Zingiziwa Mhe. Maige Amesema "kwanza napenda kutoa shukurani zangu za dhati kwa Mkurugunzi wa Halmashauri ya Jiji la Dar es Salaam kwa kutupatia kiasi cha shilingi milioni 100 kwa ajili ya ujenzi wa soko letu la Zingiziwa hivyo niwaombe wananchi wa  Kata ya Zingiziwa kuwa wavumilivu kwani huduma za jamii zote zitatufikia na pia niwasihi tuendelee kubaki sokoni kwani ndiyo sehemu salama kwaajili ya kufanya biashara zetu kwa  kujipatia  kipato na kuiongezea Halmashauri yetu pato la ndani."