Ndg. Mabelya ameyasema hayo leo Oktoba 04, 2014 wakati wa ufunguzi wa mafunzo yaWajumbe wa Kamati za Huduma za mikopo ngazi ya Kata, Halmashuri na Wilaya ya utoaji na usimamizi wa mikopo ya asilimia (10%) kwa vikundi vya Wananwake, Vijana na Watu wenye ulemavu yanayofanyika kwa muda wa siku 3 katika Ukumbi wa Shule ya Uongozi ya Mwalimu Julius Nyerere Iliyopo Kibaha Mkoani Pwani.

Aidha, Ndg. Mabelya ameeleza kuwa Serikali imeanza kutoa mikopo ya asilimia 10 baada ya hapo awali kusitishwa kutokana na changamoto zilizojitokeza huku akimshukuru Mheshimiwa Rais wa Jamuhuri ya Muungano wa Tanzania Dkt. Samia Suluhu Hassan kwa kurejesha mikopo ya asilimia 10 na Halmashauri ya Jiji la Dar es Salaam kuwa miongoni mwa Halmashauri zilizochaguliwa kwa awamu nyingine.

"Mnano mwezi Aprili, 2024 Mh. Rais Dk. Samia Suluhu Hassan alitangaza kurejesha tena utoaji wa mikopo ya asilimia 10 kwa vikundi vya wanawake, vijana na watu wenye ulemavu kuanzia Julai 2024 kwa utaratibu wa kutumia benki kwa Halmashauri 10 za majaribio Halmashauri ya jiji la Dar es salaam ikiwa ni mojawapo hivyo niwahakikishie tu baada ya mafunzo haya nitashirikiana na watendaji wangu kuhakikisha mikopo hiyo inatolewa kwa ufanisi pia nitoe rai kwenu kuhakikisha mnawajibika katika kushiriki, utulivu na uelewa ili mkatende kwa weledi na kuongeza ufanisi na tija zaidi ili kutimiza adha ya Mhe. Rais ya kuwakwamua wananchi kiuchumi". Amesema.

Sambamba na hilo, Ndg. Mabelya ameeleza kuwa Halmashauri imepanga kutoa mikopo kwa jumla ya vikundi 360, ikiwa vikundi 150 ni vya wanawake, 150 vijana na 60 ni kwa watu wenye ulemavu ambapo jumla ya shilingi bilioni  11.8 zinategemewa kutolewa kwa vikundi hivyo na kipaumbele ni kwa miradi inayolenga matumizi ya nishati safi kwa mama lishe, kuboresha mazingira kwa wanawake wafabiashara katika masoko, kuboresha mazingira ya vijana waendesha bodaboda na bajaji na kuanzisha na kuendeleza  viwanda vya uzalishaji samani za ofisi na mashuleni sambamba na kuboresha miradi ya uzalishaji tofali na uuzaji wa vifaa vya ujenzi huku akieleza kuwa Halmashauri inaendelea kufatilia deni la  mikopo kiasi cha shilingi Bilioni 19.7 ambapo kati ya hizo jumla ya shilingi bilioni 15.9 ipo ndani ya muda wa marejesho na jumla ya shilingi bilioni 4 wapo nje ya muda wa marejesho na wanaendelea kurejesha kwa mujibu wa makubaliano mapya.