Kamati ya Mipango Miji Jiji la DSM yakagua miradi iliyotekelezwa kwa kipindi cha Julai-Septemba, 2021

Posted on: November 2nd, 2021

Na: Judith Damas

Kamati ya Mipango Miji na Mazingira  Halmashauri ya Jiji la Dar es Salaam, leo tarehe 02 Novemba, 2021 wamefanya ziara  ya ukaguzi wa miradi ya maendeleo iliyotekelezwa na Halmashauri ya Jiji la Dar es Salaam kwa kipindi cha  robo ya kwanza ya mwaka wa fedha 2021/2022  ulioanza Julai hadi Septemba 2021.

Wakiwa kwenye ziara hiyo, kamati iliweza kutembelea na kukagua miradi minne (4) ikiwemo  ujenzi wa Barabara ya nje katika machinjio ya vingunguti na ujenzi wa mabucha ya nyama vingunguti, ujenzi wa paa la Machinga Complex pamoja na stendi ya daladala ya Kinyerezi iliyopo chini ya mradi wa DMDP.

Aidha, ujenzi wa barabara ya nje katika machinjio ya vingunguti uliogharimu takribani shilingi Milioni 264  kazi ikiwa kwenye hatua ya ukamilishaji huku ujenzi wa mabucha wenye gharama ya shilingi Milion 197.7 ujenzi ukiwa unaendelea.

Kwa upande mwingine kamati iliweza kutembelea ujenzi wa paa katika Soko la Machinga  complex ambapo mradi umeshakamilika na biashara zinaendelea.

Naye, Mwenyekiti wa kamati hiyo, Mhe. Sultan  Salim akifanya majumuisho ya ziara hiyo amesema, "Leo tumetembelea baadhi ya miradi inayosimamiwa na kutekelezwa na Halmashauri ya Jiji la DSM ambapo tumeweza kuridhishwa na utekelezaji huo japo kuna marekebisho madogomadogo yakukamilisha hususani katika stendi ya kinyerezi"

Sambamba na hilo Mhe. Sultan ameendelea kusema, "Ziara yetu imekua na mafanikio makubwa kwani tumeweza kutembelea ujenzi wa paa katika Soko La Machinga Complex ambapo ujenzi umeshakamilika na biashara zinaendelea hivyo tunamshukuru sana Rais wa Jamhuri ya Muungano wa Tanzania Mhe. Samia Suluhu kwa kuweza kutupatia pesa kwaajili  ya ujenzi wa paa kusudi wafanya biashara waweze kufanya biashara katika mazingira rafiki na tulivu kwani pia tumeona baadhi ya machinga waliokua wakifanya biashara maeneo yasiyo rasmi baadhi yao pia wapo soko la Machinga Complex wanafanya biashara zao."