Ukaguzi wa miundombinu ya Kituo Kikuu cha Mabasi yaendayo Mkoani cha Ubungo

Posted on: April 21st, 2017

Waheshimiwa Madiwani wa Halmashauri ya Jiji la Dar es Salaam na Wajumbe wa Kamati ya Mipangomiji, Mazingira na Usafirishaji wakiongozwa na Mwenyekiti wa Kamati hiyo Mhe. Patrick Asenga na wajumbe wa timu ya menejimenti ya Halmashauri ya Jiji wamefanya ziara ya ukaguzi wa miundombinu ya Kituo Kikuu cha Mabasi yaendayo Mkoani cha Ubungo.

Halmashauri ya Jiji la Dar es Salaam inaendelea kuboresha miundombinu ya kituo hicho na huduma mbalimbali zinazotolewa katika kituo hicho katika mwaka wa fedha wa 2016/2017 ili kuweza kutoa huduma bora ya usafirishaji.

Pamoja na ziara hiyo Wajumbe wa Kamati ya Mipangomiji, Mazingira na Usafirishajii wa Halmashauri ya Jiji la Dar es Salaam wamepata fursa ya kuongea na wananchi na wafanyabiashara mbalimbali ndani ya kituo hicho cha mabasi na kusikiliza kero, malalamiko na changamoto wanazokumbana nazo na kuahidi kuzipatia ufumbuzi haraka ili waweze kutumia kituo katika mazingira bora.