Wakazi wa Kata ya Gongolamboto wahimizwa kujiandikisha kujiandikisha kwenye daftari la mpiga kura

Posted on: October 10th, 2024

Mstahiki Meya wa Jiji la Dar es Salaam Mhe. Omary Kumbilamoto  amewasisitiza wakazi, wazazi, walezi pamoja na  wanafunzi wenye sifa ya kupiga kura  kujitokeza kwa wingi kujiandikisha  kwenye daftari la mpiga kura la Uchaguzi wa Serikali za Mitaa Ili waweze kushiriki uchaguzi wa Serikali za Mitaa  2024  kwa  kuchagua viongozi wanaowapenda.

Mhe. Kumbilamoto  ameyasema hayo leo octoba 10, 2024 wakati akizungumza  na  Wananchi waliojitokeza katika sherehe ya mahafali ya 20   ya kidato cha nne ya shule ya sekondari Juhudi  yaliyofanyika katika viwanja vya shuleni hiyo Jijini Dar es Salaam.

“Nipende kutumia nafasi hii kuwakumbusha wananchi wote mliojitokeza katika  sherehe hii ya mahafali,    wenye sifa  za kupiga kura mjitokeze kwa wingi  katika Zoezi la kujiandikisha kwenye Daftari la  mpiga     kura la Uchaguzi wa Serikali za Mitaa katika maeneo yenu  , Zoezi hili linatarajia kuanza   siku ya kesho tarehe 11 hadi 20 octoba 2024 ambalo litadumu kwa muda wa siku kumi” amesema Mhe. Kumbilamoto.

Sambamba na hilo, Mhe. Kumbilamoto amewataka wazazi na walezi wa wanafunzi hao kusimamia malezi bora na usalama wa  watoto hao wanapokua nyumbani  ili  kujenga kizazi chenye maadili huku akiwahakikishia viongozi wa Shule kutatua changamoto ya upungufu wa madarasa pamoja na uzio.

Awali akisoma Risala, Mkuu wa shule ya sekondari Juhudi Mwl. Happiness Pallangyo  ameeleza kuwa Shule ya Sekondari Juhudi imekua ikifanya vizuri katika eneo la taaluma na nidhamu kwa ujumla kwani wanafunzi wa Shule hiyo wamekuwa wakifanya vizuri toka 2022 hadi sasa huku akisisitiza kuendelea kusimamia maadili na nidhamu kwa watoto Ili kuendelea kuongeza ufaulu.

Sambamba na hilo, Mwl. Pallangyo ameishukuru Serikali ya Awamu ya Sita chini ya Rais Mheshimiwa Dkt.Samia Suluhu Hassan kwa fedha anazoendelea kuzitoa katika kuhakikisha sekta ya Elimu inaendelea kukua huku akimshukuru Mkurugenzi wa Jiji la Dar es Salaam kwa kuendelea kuboresha miundombinu ya Elimu katika Shule  ya Sekondari Juhudi na Shule zote za Jiji la Dar es Salaam.